Аляксей ФЁДАРАЎ
Набірае разгон 2013 год. Як жа яго распачалі жывёлаводы нашага раёна? Хто і колькі прадае зараз малака дзяржаве? Каб адказаць на гэтыя пытанні, прааналізуем толькі адзін дзень працаўнікоў ферм.
Як вядома, цяпер у жывёлагадоўлі ідзе адзін з самых адказных перыядаў – стойлавае ўтрыманне статка. Вельмі важна ў гэты час не знізіць прадуктыўнасць жывёлін, а дабіцца яе росту і рэалізоўваць дзяржаве прадукцыю высокай якасці. І сёння прыемна адзначыць, што з гэтай задачай у некаторых гаспадарках паспяхова спраўляюцца.
Возьмем, да прыкладу, 2 студзеня. Усяго за гэты дзень наш раён прадаў дзяржаве звыш 158 тон малака – на 5,8 тоны больш, чым у такі час 2012 года. А найбольш важкі ўклад у агульны поспех унеслі такія гаспадаркі, як СВК “Асавецкі”, “Аляксеевічы-Агра”, “Імянінскі” і “Бездзеж-Агра”. Так, толькі з Осаўцаў на прыёмны пункт паступіла больш як 28 тон сырадою.
Астатнія гаспадаркі не прадалі дзяржаве і па 10 тон прадукцыі. Асабліва мала яе паступіла з ПВУП “Гутава”, СВК “Радастаўскі” і “Прыазёрскі” – адпаведна 3,3, 4,7 і 5,7 тоны. Ды інакш і не магло быць, бо ў гэтых сельгасарганізацыях прадуктыўнасць кароў невысокая. У Гутаве, напрыклад, яна ў параўнанні з мінулагоднім зменшылася на 2,2 кілаграма, а ў Радаставе – на 600 грамаў ад кожнай буронкі.
Пэўную колькасць прадукцыі 2 студзеня не даатрымалі ў параўнанні з леташнім у СВК “Бездзеж-Агра”, “Агра-Дзеткавічы”, “Пенякова” і племзаводзе “Заказельскі”. У Бездзежы, напрыклад, валавы малака знізіўся амаль на 1,6 тоны.
Некалькі слоў пра таварнасць малака. Высокая яна (звыш 90%) у СВК “Асавецкі”, племзаводзе “Заказельскі”, а самая нізкая (82,2%) у СВК “Ліпніцкі”.
Усім гаспадаркам неабходна павышаць і якасць малака. 2 студзеня яны даставілі на нарыхтоўчыя пункты 72,9% прадукцыі вышэйшым гатункам і 7,6% класам “экстра”. Дарэчы, апошняе ў колькасці амаль 12 тон паступіла толькі з СВК “Асавецкі”. А вось сельгаскааператывы “Ліпніцкі”, “Асіпавічы” і “Пенякова” ў названы дзень не рэалізавалі ніводнага кілаграма прадукцыі вышэйшым гатункам.
Як вядома, значныя грашовыя сродкі сельгасарганізацыі сёння атрымліваюць ад продажу дзяржаве малака. Таму павелічэнню вытворчасці і павышэнню яго якасці павінна ўдзяляцца самая сур’ёзная ўвага як з боку кіраўніцтва гаспадарак, так і спецыялістаў адпаведных раённых служб.
