Як вядома, на тэрыторыі нашага раёна размяшчаецца частка плошчаў рэспубліканскага біялагічнага заказніка “Спораўскі”. Нядаўна нам стала вядома, што іменна ў гэтым заказніку будзе пабудавана фотаэлектрастанцыя. Яна павінна генерыраваць ад сонца экалагічна чыстую энергію з наступным яе продажам.
– Па папярэдніх падліках, станцыя магутнасцю ў 100 кВт будзе кожны месяц прыносіць прыбытак каля 30 млн. беларускіх рублёў. Гэта дазволіць нам атрымліваць дадатковыя фінансавыя сродкі, якія будзем выкарыстоўваць на вырашэнне пытанняў прыродаахоўнай дзейнасці, – сказаў у гутарцы з журналістамі Вадзім Пратасевіч, дырэктар заказніка, старшыня праўлення мясцовага экалагічнага фонду “Заказнікі Брэсцкай вобласці”.
Акрамя фотаэлектрычнай станцыі на базе эколага-асветнага цэнтра заказніка “Спораўскі” плануецца стварыць навучальны цэнтр па біялагічных рэсурсах і альтэрнатыўнай энергетыцы. Для гэтага ўжо манціруюцца гелеакалектар на 500 літраў і газагенератарны кацёл.
Паводле слоў Вадзіма Пратасевіча, 9 студзеня ў беларускім прадстаўніцтве Праграмы развіцця ААН (ПРААН) паміж праграмай малых грантаў глабальнага экалагічнага фонду (ПМГ/ГЭФ) і мясцовым экалагічным фондам “Заказнікі Брэсцкай вобласці” было падпісана адпаведнае пагадненне. Па яго ўмовах і будзе прафінансаваны праект “Стварэнне механізма “зялёных рэінвестыцый” у Рэспубліцы Беларусь на прыкладзе заказнікаў Брэстчыны і змякчэння негатыўных вынікаў змянення клімату шляхам выпрацоўкі і продажу ў энергасетку экалагічна чыстай электраэнергіі”. Бюджэт праекта складае 243 тысячы долаў США, з якіх 149 тысяч выдзяляюць міжнародныя донары.
Аляксей ФЁДАРАЎ
