Па-сямейнаму шчырай і святочнай атрымалася сустрэча з жыхарамі вёскі Дробаты, якая прайшла напрыканцы чэрвеня, у дні летняга сонцазвароту. Гэта – адно з чарговых мерапрыемстваў, арганізаваных у рамках гуманітарнага праекту “Вёска, якая не павінна знікнуць” (ён рэалізуецца ў нашых мясцінах грамадскім аб’яднаннем аматараў мастацтва рэгіёну “Белавежская пушча” і Брэстчыны “Тур”). На гэты раз перад вяскоўцамі выступіў фальклорны калектыў “Гаманіна” з Мінска.
Сёння Дробаты – гэта зусім невялічкая вёска, большая частка жыхароў якой – пажылыя людзі. Па словах Людмілы Мікалаеўны Карнеевай, аднаго з каардынатараў праекту, калі ў гэтым населеным пункце было абвешчана аб канцэрце, дзеці, якія прыехалі на летні адпачынак да сваіх бабуль і дзядуль, здзіўляліся: “Хіба бываюць канцэрты ў вёсках?” Ды і тутэйшыя пенсіянеры сумняваліся: “І для каго гэты канцэрт? У нас жа і жыхароў амаль не засталося?”.
Але ж канцэрт адбыўся і сабраў амаль 60 гледачоў. Ведаючы, што мерапрыемствы ў рамках праекту “Вёска, якая не павінна знікнуць” заўжды праходзяць весела і цікава, на канцэрт прыйшло і нямала жыхароў суседніх населеных пунктаў Вавулічы і Сорацні. І ў выніку людзей назбіралася нямала. А артысты з фальклорнага калектыву “Гаманіна” адразу наладзілі кантакт з гледачамі. Спявалі прыпеўкі, танчылі разам.
“Вельмі прыемна, што самы актыўны ўдзел у мерапрыемстве прынялі пажылыя пенсіянеры, якія знаходзяцца ў складзе мэтавай групы праекту “Вёска, якая не павінна знікнуць”. Яны з задавальненнем успаміналі часы свайго юнацтва і заўзята танчылі побач з маладымі. Атмасфера свята была цёплай, добразычлівай і аптымістычнай. Многія з пажылых пенсіянераў зазначалі, што даўно не памятаюць у сваёй вёсцы такіх вясёлых сустрэч. А 87-гадовая Ганна Фёдараўна Вакульчык прызналася, што ўвогуле ўжо не памятае, калі яна апошні час была на канцэрце.Так што мерапрыемствам засталіся задаволены ўсе: і гледачы, і артысты, і каманда нашага праекту”, – падкрэсліла Л.М. Карнеева.
Пры гэтым Людміла Мікалаеўна зазначыла, што крыху раней падобныя мерапрыемствы ў рамках праекта “Вёска, якая не павінна знікнуць” прайшлі ў вёсках Сорацні, Гутава і Агдэмер. На бліжэйшы выхадны дзень, 8 ліпеня, намечана экскурсія ў Мотальскі музей для прадстаўнікоў мэтавай групы, якія не былі там у мінулым годзе. А чарговы канцэрт запланаваны на 21 верасня, і пройдзе ён у вёсцы Вавулічы, якая ў гэты дзень будзе адзначаць прастольнае свята ў памяць заснавання свайго вясковага храма.
Галіна ВІКТАРАВА
