Ой, ладачкі-ладкі, надышлі Калядкі…Святочнае тэатралізаванае прадстаўленне для жыхароў і гасцей Драгічына падрыхтавалі самадзейныя артысты ўстаноў культуры раёна

Святы вечар з поснай ежай, урачыстымі богаслужэннямі і непагасным святлом Віфлеемскай зорачкі спакваля ўступіў месца вяночку вясёлых зімовых свят. “Хрыстос нарадзіўся – Бог уцялесніўся…” – з раніцы гучала ў царкоўных песнапеннях. Гасподзь, які больш як дзве тысячы гадоў назад змясціўся ў Віфлеемскіх яслях, нарадзіўся ў нашых сэрцах, напоўніўшы іх святочнай радасцю.

А вечарам, 7 студзеня, у першы дня Ражства, святочныя віншаванні жыхарам і гасцям Драгічына дасылалі самадзейныя артысты ўстаноў культуры раёна. На гарадской плошчы развярнулася каларытная дзея святкавання Калядак у лепшых народных традыцыях — з ваджэннем Казы, якая лічылася сімвалам урадлівасці і дабрабыту, з жартамі, спевамі, шчырымі пажаданнямі ўсялякіх жыццёвых даброт: каб жылося і вялося і сала ў кубле не звялося; каб здароўя на ўвесь год і ў хаце прыплод; каб не збяднелі дух і вера, каб адыходзіла бяда, а шчасце нас не пакідала…

 Гледачы і слухачы, дарослыя і дзеці, якія сабраліся на плошчы, ахвотна далучаліся да святкавання, вадзіліся карагоды, танцавалі і падпявалі самадзейным артыстам, што толькі распачалі вяночак добрых зімовых свят. Бо наперадзе – Шчадруха і Вадохрышча. А там і да Стрэчання недалёка, якое, па-сутнасці, завяршае зіму…

Галіна ВІКТАРАВА
Фота аўтара