Падведзены вынікі абласнога конкурсу на званне лепшага кіраўніка сельскагаспадарчага і перапрацоўчага прадпрыемства аграпрамысловага комплексу за 2013 год.
Пры вызначэнні пераможцаў улічваліся розныя паказчыкі, у тым ліку выхад збожжа з 1 бала-гектара ворыва, выхад кармавых адзінак з 1 бала-гектара сельгасугоддзяў, прырост вытворчасці валавой сельгаспрадукцыі да ўзроўню папярэдняга года, выручка ад рэалізацыі сельгаспрадуктаў, тавараў, работ і паслуг на аднаго працаўніка, чысты прыбытак у разліку на 1 бала-гектар сельгасугоддзяў, аб’ём інвестыцый, узровень сярэднямесячнай зарплаты работнікаў і г.д. Кожны прэтэндэнт ацэньваўся па сумарнай колькасці балаў, якія ён набіраў па ўсіх пазіцыях.
Вынікі конкурсу падводзіліся ў некалькіх намінацыях. Усяго вызначана 14 пераможцаў, якіх назвалі залатым фондам брэсцкай вёскі.
Прыемна ўсведамляць, што ў намінацыі «Лепшы кіраўнік сельскагаспадарчага прадпрыемства Брэсцкай вобласці за 2013 год са стажам работы звыш 5 гадоў» пераможцамі сталі і прадстаўнікі нашага раёна: Станіслаў Іосіфавіч Цынкус – старшыня СВК «Асавецкі» і Уладзімір Аляксандравіч Сухарэвіч – старшыня СВК «Імянінскі».
Да ўсяго сказанага хочацца дадаць, што С.І.Цынкус ужо неаднаразова прызнаецца лепшым, а вось У.А.Сухарэвіч – лаўрэат. Дарэчы, у свой час Станіслаў Іосіфавіч працаваў галоўным інжынерам у Імяніне, уважліва прыглядаючыся да метадаў і вопыту работы Уладзіміра Аляксандравіча. І вось, як гаворыцца, і настаўнік, і вучань аказаліся дастойнымі кіраўнікамі, на справе даказалі, што валодаюць усімі «сакрэтамі» павышэння інтэнсіфікацыі сельгасвытворчасці. СВК «Асавецкі» і «Імянінскі» – перадавыя гаспадаркі Брэстчыны, дзе паспяхова вырашаюцца не толькі надзённыя пытанні сельскагаспадарчага працэсу, але і шматлікія праблемы так званага сацкультбыту.
Сяргей АЛЁШЫН
