Не зусім стандартным чынам вырашыў адзначыць свой 60-гадовы юбілей наш зямляк, ураджэнец вёскі Гутава, паэт-песеннік, прадзюсар грамадскага аб’яднання “Беларускі саюз музычных дзеячаў” Анатоль Мікалаевіч Антановіч: у бліжэйшую суботу, 28 лютага, а 15 гадзіне, ён збірае сяброў і прыхільнікаў сваёй творчасці ў гарадскім Доме культуры.
– Анатоль Мікалаевіч, у кнізе “Землякі” вашага слыннага аднавяскоўца, пісьменніка і паэта Ула- дзіміра Сітухі, які, на жаль, не вельмі даўно пайшоў з жыцця, засталіся такія радкі:
Як не ўспомніць мне
пра Лёву,
І пра Янку Замкавец,
Ды пра хлопцаў
Ляхаўцовых,
З кім паслі кароў, авец…
Пад “хлопцамі Ляхаўцовымі” аўтар меў на ўвазе братоў Антановічаў. Раскажыце пра вытокі вашай творчасці?
– Усё пачыналася са школы, дзе мае здольнасці развіваліся пры падтрымцы нашага класнага кіраўніка, выкладчыцы рускай мовы і літаратуры Марыі Ігнацьеўны Гук і іншых настаўнікаў. Пасля заканчэння Гутаўскай дзесяцігодкі паступіў на гідрафак ў сельгасакадэмію ў Горках. Там, сорак гадоў таму назад, я і напісаў сваю першую песню “За гарызонт”, прысвечаную студэнтам будаўнічых атрадаў. Гэты твор прагучаў тады на конкурсе буд-атрадаўскай песні, дзе заслужыў нямала добрых водгукаў.
Пазней была служба на Балтыйскім флоце, пасля чаго вярнуўся ў родныя мясціны. Працаваў у суседнім, Іванаўскім, раёне: спачатку – майстрам ме-ліяратыўнай калоны, інструктарам, загадчыкам сельгасаддзела тагачаснага райкама КПБ, намеснікам кіраўніка калгаса ў Моталі, і амаль два дзесяцігоддзі – дырэктарам саўгаса імя Паліўкі ў Тышкавічах.
На гэтай пасадзе займаўся не толькі гаспадарчымі справамі, але і падтрымліваў сферу культуры, развіццё мастацкай самадзейнасці ў сельскай мясцовасці, спрыяў станаўленню тутэйшага фальклорнага калектыва “Знаходка”, прыкладаў намаганні для ўмацавання духоўнай спадчыны. У прыватнасці, у свой час актыўна садзейнічаў ўзвядзенню праваслаўнага храма ў Тышкавічах, будаўніцтву сельскага Дома культуры ў гэтым жа населеным пункце, які ў 2006 годзе на конкурсе аналагічных устаноў быў названы адным з лепшых у рэспубліцы. А дзесяць гадоў таму назад выступіў ініцыятарам правядзення ў Тышкавічах міжнароднага фестывалю “Фальклор без межаў”, і ўсё гэта прыносіць глыбокае маральнае задавальненне. Праўда, раней гэта было захапленнем, цяпер стала работай.
– Давайце з мінулых часоў вернемся ў цяперашнія дні і нагадаем пра творчую сустрэчу, якая маецца адбыцца ў бліжэйшую суботу: хто прыме ўдзел у вашым праекце?
– У Драгічын прыедзе і выступіць вядомы беларускі кампазітар, выканаўца песень Алег Елісеенкаў, які доўгі час супрацоўнічае з Аляксандрам Саладухай, і з’яўляецца аўтарам многіх яго песень. Акрамя таго, драгічынцы будуць мець магчымасць сустрэцца з ураджэнцам нашых мясцін, аўтарам некалькіх кніг Анатолем Дзенісейкай, пачуць “залатыя галасы” суседняй Іванаўшчыны – вакалістаў Валянціна Чугаева, Алы Хала, удзельніцы праекта “Поющие города” Анастасіі Сярновай, выпускніцы акадэміі імя Шырмы Ганны Дашкевіч і іншых.
– З надыходзячым днём нараджэння! І поспехаў у вашым пачыне!
Галіна ВІКТАРАВА
Фота Валерыя МІХАЛЬЧУКА
