На сучасным этапе супрацоўнікамі аддзела ЗАГС Драгічынскага райвыканкама практыкуецца правядзенне ўрачыстых рэгістрацый шлюбаў, народзін, а таксама віншаванне юбіляраў сямейнага жыцця на беларускай мове. Адно з такіх мерапрыемстваў нядаўна было наладжана ў гарадскім Доме культуры, дзе начальнік аддзела запісу актаў грамадзянскага стану райвыканкама Ірына Сяргееўна Кез правяла абрад рэгістрацыі нованароджанага дзіцяці.
Дзяўчынка з’явілася на свет гэтым летам і стала першынцам у маладой сям’і Наталлі Валер’еўны і Дзмітрыя Аляксандравіча Саўчукоў з Драгічына, а таксама чаканай унучкай для сваіх дзядуль і бабуль – Таццяны Пятроўны і Валерыя Вячаслававіча Максімовічаў, Валянціны Фёдараўны і Аляксандра Сцяпанавіча Саўчукоў. Адметная роля ў гэтай урачыстасці належыла і ганаровым бацькам немаўляці – Вользе Валер’еўне Карэнковіч і Ігару Аляксеевічу Жэдзіку.
У ходзе рэгістрацыі нованароджанай шырока выкарыстоўваліся элементы народных традыцый. Прынамсі, дзеля шчаслівай долі дачушкі маладыя бацькі паклалі немаўлятка на свой шлюбны ручнік, які захоўвалі з дня вяселля, як сімвал доўгага і шчаслівага сямейнага падарожжа па жыццёваму шляху. І цяпер той ручнік стане абярэгам для ўсёй іх сям’і, якая з часам павялічваецца.
У прысутнасці родных і блізкіх нованароджаная дзяўчынка была зарэгістравана і абвешчана паўнапраўнай грамадзянкай нашай краіны Валерыяй Дзмітрыеўнай Саўчук. У яе гонар прагучаў Дзяржаўны гімн Рэспублікі Беларусь, і віноўніца ўрачыстасці прыняла першыя ў сваім жыцці віншаванні і падарункі.
У ходзе цырымоніі неаднойчы падкрэслівалася асаблівая роля родных і блізкіх людзей у дастойным выхаванні дачкі, унучкі, грамадзянкі сваёй краіны Валерыі Саўчук. Адпаведныя напамінкі аб гэтым былі ўручаны новаяўленым дзядулям і бабулям. А маладыя бацькі маленькай Леры – Наталля Валер’еўна і Дзмітрый Аляксандравіч – атрымалі “Наказ у будучыню” і сімвалічныя знакі, што пацвярджаюць іх новы і вельмі адказны статут – мамы і таты.
Галіна ВІКТАРАВА
