Актыўны лад жыцця вылучае пенсіянераў Еўдакію Іванаўну Зіновіч і Фёдара Фёдаравіча Булыгу з Вулькі Сіманавіцкай. Нягледзячы на сталы ўзрост, гэтых вядомых у нашым раёне носьбітаў народных рамёстваў і выканаўцаў старадаўніх паляшуцкіх песень часта запрашаюць на канцэрты і фестывалі, дзе прапагандуецца захаванне і адраджэнне нацыянальных традыцый. Такім чынам, у сярэдзіне жніўня вяскоўцы пабывалі ў Польшчы, на Люблінскім кірмашы, а ў пачатку верасня Еўдакія Іванаўна і Фёдар Фёдаравіч атрымалі запрашэнне на фестываль “Камяніца”, які праходзіў у музеі беларускай народнай архітэктуры і побыту паблізу Мінска. Там яны з поспехам правялі майстар-класы (Еўдакія Іванаўна прала кудзелю, а Фёдар Фёдаравіч плёў лапці), а таксама выступілі ў канцэртнай праграме, праспяваўшы некалькі старадаўніх песень на паляшуцкім дыялекце. Разам са шчырымі апладысментамі ў зале нярэдка чулася настальгічнае: ”Вось так і мая бабуля некалі спявала…”. І такія водгукі сямейны дуэт з Драгічыншчыны лічыць найлепшым прызнаннем іх самабытнага народнага майстэрства.
Галіна ВІКТАРАВА
