Вечарам 6 ліпеня на сялянскім падворку “Каля Плэса” музея народнай творчасці “Бездзежскі фартушок” пройшлі гулянні з нагоды народнага свята “Капалле”.
У гэты вечар сустрэць купальскую ноч у Бездзежы сабраліся не толькі мясцовыя жыхары, але і шматлікія госці з нашага раёна і з-за яго межаў. Тэатралізаванае прадстаўленне «Купальскія прыгоды», фаер-шоу і запальванне вялікага купальскага вогнішча, вакруг якога госці вадзілі святочны карагод – ўсё гэта стварала непаўторную атмасферу народнага свята.
Весялілі наведвальнікаў мерапрыемства сваімі спевамі творчыя калектывы клубных устаноў раёна. Таксама для гасцей працавалі розныя тэматычныя пляцоўкі, на якіх можна было набыць купальскія вянкі, сувеніры, смачныя пачастункі. А яшчэ, кожны жадаючы маў магчымасць выпрабаваць сябе ў конкурсах, латарэях, ну і, вядома, стварыць пажаданую выяву праз аквагрым.
Кульмінацыяй свята стала пусканне на ваду Купалінкай вянка, пасля чаго і кожная з дзяўчат магла самастойна пусціць на хвалі свой асабісты купальскі вянок. Завяршыліся гулянні святочнай дыскатэкай.
Максім РОДЗЬКА.
Фота аўтара.
