“БЕКАС” ПЕРААДОЛЬВАЕ МЕЖЫ

З Польшчы нядаўна вярнуўся ансамбль паляўнічай музыкі “Бекас” Драгічынскай школы мастацтваў.
Пяты раз творчы калектыў, аналагаў якому няма на Беларусі, удзельнічаў у фестывалі паляўнічай музыкі, які штогод улетку ладзіцца ў горадзе Тухола. І на гэты раз драгічынскія выканаўцы паляўнічых маршаў і фанфар былі адзначаны дыпломамі музычнага фэсту.
Так, Мікалай Шавялюк заняў другое месца сярод салістаў свайго класа. Два другіх прызавых месцы ў розных намінацыях былі прысуджаны ансамблю.
Але найвялікшай узнагародай для калектыву стаў парфарасны рог. Музычны інструмент, пра які даўно марылі кіраўнік гурта Мікалай Шаўчук і яго выхаванцы, падарылі беларусам арганізатары фестывалю.
Няма часу для адпачынку “бекасятам”. Напачатку жніўня Мікалай Шаўчук, Мікалай Шавялюк і Аляксей Амялюсік маюць намер паўдзельнічаць у Міжнародным фестывалі ў гонар заступніцы палявання Дзіяны. Упершыню калектыў атрымаў запрашэнне выступіць ва Украіне: фестываль будзе праводзіцца ў Львове.

Ніна ТКАЧУК.