ЭКСКУРСІЯ Ў БЯРОЗУ

Сёлетняй зімой вучні нашай школы разам з вучнямі Завершскай АБШ пабывалі на экскурсіі ў горадзе Бяроза.
У падарожжа мы адправіліся на новенькім камфартабельным аўтобусе. Прыемна было знаходзіцца ва ўтульным, цёплым салоне, любавацца вёсачкамі, палямі і лясамі, якія мільгалі паабапал дарогі. Калі гэты занятак надакучаў, можна было паглядзець тэлевізар. Дарэчы, аўтобус, які АП-15 прадастаўляе для экскурсій, абсталяваны ажно двума тэлевізарамі.
У Бярозе перш наперш мы наведалі Лядовы палац. Ён уразіў нас сваёй велічнасцю і прыгажосцю. Сустрэлі нас прыветліва, кожнаму далі ладныя чаравікі з канькамі. Не ўсе з нас умелі добра стаяць на каньках, таму многім напачатку давялося трымацца за борцік. Але былі і такія, хто адразу ж упэўнена пабег па люстраной паверхні лядовай арэны.
На працягу дзвюх гадзін мы пад музыку “малявалі” мудрагелістыя фігуры на лёдзе. За гэты час усе навучыліся трымацца на каньках. Здаўшы канькі, мы з задавальненнем падсілкаваліся ў буфеце Ледніковага палаца.
Цікавай атрымалася і экскурсія па мясцовым гісторыка-краязнаўчым музеі, дзе мы пазнаё-міліся з народнымі промысламі, творамі бярозаўскіх мастакоў, гістарычнымі падзеямі, якія адбываліся на тутэйшых землях, героямі, якія праславілі Бярозаў-шчыну.
Асабліва нас уразілі заняткі ў “лясной” партызанскай школе. Тут мы пісалі пісьмы-трохкутнікі савецкім воінам на фронт, рашалі задачы з дапамогай сасновых шышак, спявалі песню “Катюша”.
Пакідаючы музей, мы агле-дзелі выставу дзіцячых работ і набылі сувеніры на памяць.
Паездка ў Бярозу атрымалася цікавай і багатай на добрыя ўражанні. Яна запомніцца нам надоўга.

Дар’я ФЕДЗЮКОВІЧ,
Марына АБРАМОВІЧ,
вучаніцы 6 класа Вавуліцкай АБШ.