Гэты калектыў можна з упэўненасцю назваць адной з ярчэйшых і самабытнейшых “зорак” нашай раённай сцэны. Выступленне ансамбля народнай песні і музыкі “Сваякі” Бездзежскага сельскага Дома культуры захапляе і натхняе гледачоў, кранаючы душу і абуджаючы ў ёй самыя лепшыя пачуцці і памкненні, таму яго канцэрты заўжды суправа-джаюцца шчырымі, працяглымі апладысментамі.
Песенны калектыў быў створаны ў 1996 годзе па ініцыятыве тагачаснай загадчыцы аддзела культуры З.І.Краўцовай, а першым яго кіраўніком стаў Л.С.Куроўскі. Ужо ў наступным, 1997 го-дзе, бездзежскі ансамбль атрымаў званне “народны аматарскі калектыў”. З гэтага часу ён стано-віцца пастаянным удзельнікам не толькі раённых, абласных, рэспубліканскіх мерапрыемстваў, якія праходзяць у Беларусі, але і прымае ўдзел у святочных фэстах суседніх краін.
У 2000 годзе творчы калектыў узначальвае А.А.Вакула. Пад яго кіраўніцтвам рыхтуецца новая канцэртная праграма, у якую ўвайшлі і лірычныя аўтарскія песні Аляксандра Аляксандравіча. Ансамбль “Сваякі” становіцца жаданым удзельнікам многіх святочных праграм і канцэртаў. У 2005 годзе ён выступае ў Варшаве на адкрыцці нацыянальнай выставы Рэспублікі Беларусь у Польшчы, дзе сваімі песнямі вітае афіцыйных гасцей – дэпутатаў Сейма і Сената, кіраўнікоў дыпламатычных місій і г.д.
Летась бездзежскі ансамбль быў запрошаны для ўдзелу ў Міжнародным фестывалі фальклору славянскіх народаў у старажытным польскім мястэчку Алешніцы паблізу Вроцлава, дзе выступіў разам з артыстамі з Украіны, Венгрыі, Румыніі, іншых краін. У свой час пабывалі “Сваякі” і на ўрачыстасцях, прысвечаных святкаванню горада Масквы. Памятаюць сельскія музыкі, як аднойчы яны сустракалі гасцей з Італіі ў сваіх мясцінах, у музеі “Бездзежскі фартушок”, і як тыя, захапіўшыся песнямі вясковых артыстаў, не ўтрымаліся і пад акампанемент “Сваякоў” пайшлі танцаваць нашу беларускую польку.
Сёлета ансамбль народнай песні і музыкі, у саставе якога, акрамя Аляксандра Вакулы, выступаюць Раман Чайкоўскі, Аляксандр Каласей, Сяргей Кочык, Аляксандр Кочык, Анатоль Шыкула і Віктар Родак, таксама шмат дзе пабываў з канцэртамі. Яны выступілі на Міншчыне, у Жабінцы, прынялі ўдзел у мерапрыемствах, прысвечаных 70-годдзю ўтварэння раёна. На святочна ўпрыгожанай сцэне “Сваякі” выканалі ўпадабаную гледачамі песню “Гэй, саловушка, спявай”, а яе аўтар А.А.Вакула быў узнагароджаны Ганаровай граматай райсавета і райвыканкама.
Нядаўна рэпертуар ансамбля папоўніўся новымі аўтарскімі песнямі Аляксандра Аляксандравіча “Гэй, Беларусь, спявай!”, “Навошта мне каханне гэтае” і іншымі, якія неўзабаве прагучаць са сцэны. Магчыма, з часам і іх пачнуць лічыць народнымі, як мяркуюць пра некаторыя папярэднія песні самадзейнага кампазітара Вакулы. Але для сваёй творчасці мастацкі кіраўнік ансамбля “Сваякі” лічыць гэта найлепшым прызнаннем.
Галіна ШАФРАН.
НА ЗДЫМКУ: ансамбль “Сваякі” Бездзежскага СДК.
