На этнаграфічным падвор’і “Каля Плэса” ў нядзелю праходзіла абласное свята-конкурс фальклорнага мастацтва “Таночак”.
Больш за тры сотні самадзейных артыстаў, якія збіраюць і выконваюць самабытныя песні сваіх продкаў, з’ехаліся ў вёску Бездзеж. Акрамя этнакалектываў Брэстчыны, што ўдзельнічалі ў конкурснай праграме, на свяце выступілі гасцявыя калектывы з Расіі, Літвы, Польшчы і іншых мясцовасцей Беларусі. Гаспадары свята – калектывы Драгічыншчыны “Вясёлыя суседзі”, “Сваякі”, “Скібічане”, “Таночак”, “Купалінка” і іншыя – паказалі этнаканцэрт з цыклу “Рух зямлі”. З раніцы за права ўдзельнічаць у рэспубліканскім фестывалі “Берагіня” сапернічалі дзіцячыя ансамблі, сярод якіх былі і нашы: “Ліпачка” – з в.Ліпнікі і “Вяночкі” – з г.п.Антопаль.
Падвор’е “Каля Плэса” спявала, гаманіла, звінела залівістымі найгрышамі гармонікаў, смяялася, грымела апладысментамі. З шаснаццаці імправізаваных домікаў выстраіўся горад майстроў, дзе можна было паназіраць за самым розным старажытным рамяством, і нават за столінскімі ганчарамі. На пяці невялічкіх падвор’ях, створаных “Каля Плэса” сельскімі Саветамі Драгічынскага раёна, удзельнікі і наведвальнікі свята з добрым апетытам ласаваліся разнастайнымі стравамі, рэцэпты прыгатавання якіх перайшлі да сучаснага пакалення ад прашчураў. Былі тут і маласольныя гурочкі, і саленыя грыбочкі, і салцісон, і каўбаса “пальцам пханая”. Розных гатункаў прапаноўваўся бярозавік: с сухафруктамі і на дубовай кары настояны, чырвоным бурачком аздоблены. Зазывалі гасцей на падвор’і творчыя калектывы добрай песняй ды музыкай.
Ніна ТКАЧУК
Фота Анны ГАЛЁТЫ
