УРАДЖАЙ-2011

Хлебаробы ААТ “Драгічынскі райаграсэрвіс” у першай палавіне дня 16 жніўня закончылі ўборку збожжавых культур, зжаўшы і абмалаціўшы іх на 1360 гектарах. Пасля абеду 2 камбайны былі выдзелены для жніва зерневых культур на прысядзібных участках вёсак Залужжа і Равіны, многія жыхары якіх вырошчваюць збожжа для развіцця і патрэб уласных гаспадарак.
Так, экіпаж камбайна КЗС-10 у складзе Мікалая Якаўлевіча Рапінчука і Аляксандра Уладзіміравіча Гука сёлета намалаціў 700 тон зерня. Цяпер механізатары ўбіраюць збажыну на прысядзібных участках жыхароў вёскі Равіны. Мы іх засталі за работай, калі яны заканчвалі абмалот пшаніцы на ўчастку Мікалая Васільевіча Казлоўскага. Вось што ён расказаў:
— Я працую ў райаграсэрвісе будаўніком, а мая жонка, Антаніна Мікалаеўна, бухгалтарам. Нягледзячы на гэта, трымаем гаспадарку. Для яе патрэб вырошчвалі 30 сотак пшаніцы. За лічаныя мінуты яе ўбралі камбайнеры за сімвалічную аплату.
Дарэчы, збожжаўборачныя камбайны аказваюць дапамогу па ўборцы зерневых культур не толькі работнікам райаграсэрвіса, але і ўсім іншым вяскоўцам. Праўда, апошнім за паслугі камбайна даводзіцца плаціць па больш высокіх тарыфах.
НА ЗДЫМКУ: жыхар вёскі Равіны Мікалай Васільевіч Казлоўскі са сваімі ўнукамі ў час уборкі пшаніцы на прысядзібным участку.
Фота Юрыя Сяргея.