spot_img
spot_imgspot_imgspot_imgspot_img

ВЫТВОРЧАСЦІ МАЛАКА – НЕАСЛАБНУЮ ЎВАГУ

Дата:

Малочнатаварныя фермы сёння ў нас называюць своеасаблівымі манетнымі дварамі. І не без падстаў. Менавіта ад вытворчасці малака і рэалізацыі яго дзяржаве сельгасарганізацыі атрымліваюць значныя грашовыя прыбыткі. Вядома, найперш тады, калі малака шмат і яно высокай якасці.
Дарэчы, асноўнымі пазіцыямі экспарту сельгаспрадукцыі з Беларусі ў мінулым годзе з’яўляліся прадукты жывёлагадоўлі, у тым ліку малака-прадукты – 60%. Сярэднія ж экспартныя цэны ў студзені-лютым 2010 года ў параўнанні з аналагічным перыядам пазамінулага года ўзраслі на сухое абястлушчанае малако на 210%, сухое натуральнае малако – на 180%, казеін – на 70,8% масла – на 70,4%, сыры і тварог – на 38,3%. У вартасным выражэнні летась ад экспарту малака і малакапрадуктаў Беларусь атрымала 1,3 мільярда долараў ЗША,
Да 2015 года экспарт малака і малочных прадуктаў плануецца павялічыць у 2 разы – да 2,6 млрд. долараў. Задача, вядома, складаная, але ўпаўне рэальная. Нездарма ў рэспубліцы вялікая ўвага надаецца ўзвядзенню новых малочнатаварных комплексаў і карэннай рэканструкцыі даўно пабудаваных.
Пэўны ўклад у агульны поспех краіны ўносяць і жывёлаводы нашага раёна. Толькі летась яны прадалі дзяржаве 8168 тон мяса і 55954 тоны малака.
Яшчэ больш складаныя і адказныя задачы стаяць перад сельскімі працаўнікамі Драгічыншчыны ў бягучым годзе. Мяркуйце самі: сёлета яны павінны атрымаць 81 тысячу тон малака і 10 тысяч тон мяса.
Хутка пройдзе першае паўгоддзе. Чым жа характэрны гэты перыяд і пачатак лета для работнікаў малочнатаварных ферм раёна?
На жаль, сёлетні пашавы сезон пакуль не стаў перыядам вялікага малака. Наадварот, штодзённа ў параўнанні з мінулагоднім раён мінусуе па вытворчасці сырадою (гл. зводку). Найбольш значны недабор прадукцыі назіраецца ў сельскагаспадарчых вытворчых кааператывах “Агра-Дзеткавічы”, “Прыазёрскі”, “Брашэвічы” і племзаво-дзе “Заказельскі”. Калі, скажам, у апошняй гаспадарцы ў гэты час летась за дзень надойвалі звыш 14 тон малака, то зараз – каля 10 тон.
З невялікім плюсам цяпер працуюць даяркі СВК “Бездзеж-Агра”. Але калі ўлічыць, што на працягу апошніх некалькіх гадоў тут зніжалася вытворчасць малака, то ніякіх падстаў для задавальнення таксама няма.
З-за моцнай спёкі травы на пашы сёлета добра не ўрадзілі, павыгаралі. Гэта – па-першае. Па-другое, у многіх гаспадарках ужо няма канцэнтратаў. Па-трэцяе, розныя сумесі, што сеялі на зялёны корм, з-за засухі не далі таго ўраджаю, што планавалася. У выніку дойны статак зараз не атрымлівае дастатковай колькасці кармоў. А гэта – асноўная прычына зніжэння прадуктыўнасці кароў.
Праўда, праверкі паказалі, што ў некаторых гаспадарках пашаваму ўтрыманню жывёлы не ўдзяляецца належная ўвага. Цяпер паўсюдна арганізавана кругласутачная пасьба кароў. Аднак не ўсюды паша своечасова падкошваецца, вызваляецца з-пад смецця, барануецца і падкормліваецца мінеральнымі тукамі.
Вялікае значэнне мае своечасовае забеспячэнне кароў на пашы дабра-якаснай вадой. Гэта павялічвае надоі на 10-19 працэнтаў. А патрэба ў пітной вадзе ў спякотнае надвор’е складае 60-80 літраў у дзень на 1 галаву жывёлы. А ці хапае ўдосталь вады гурту кароў у колькасці 250 галоў з фермы “Сасноўка” СВК “Брашэвічы”, для якіх на пашы ўстанавілі адно карыта для паення?
Лепш за ўсё на пашы ўстанаўліваць перавозныя бочкі з аўтапаілкамі. Пры іх жа адсутнасці неабходна арганізаваць справу так, каб жывёла магла піць ваду не менш 4-5 разоў у дзень.
Каб каровы на пашы не заразіліся шкоднымі захворваннямі, якія цяжка паддаюцца лячэнню, нельга дапускаць іх паення з лужын, канаў і ручаёў.
Кажуць, што маладая трава ўтрымлівае недастатковую колькасць фосфару і кальцыю, што адмоўна ўплывае на малочную прадуктыўнасць. У сувязі з гэтым кожная карова павінна атрымліваць у суткі 80-100 грамаў фосфарна-кальцыевых падкормак.
Каб папярэдзіць спецыфічнае захворванне – пашавую тэтанію, неабходна звярнуць увагу на забеспячэнне жывёлы магніем. У сярэднім у рацыён каровы яго рэкамендуецца ўводзіць 20-25 грамаў, выкарыстоўваючы для гэтага соль магнію.
Некаторую занепакоенасць выклікае і нізкая таварнасць малака ў асобных гаспадарках. Вельмі шмат яго выдаткоўваюць на розныя ўнутрыгаспадарчыя патрэбы ў СВК “Аляксеевічы-Агра”, “Ліпніцкі”, “Радастаўскі”, “Асіпавічы”. Так, напрыклад, у першай гаспадарцы 19 чэрвеня было расходавана 3744 кілаграмы малака. Залішняя раскоша! Мусіць, тут забыліся, што змяншэнне расходу малака на ўласныя патрэбы, павелічэнне яго таварнасці – адзін са шляхоў росту аб’ёмаў продажу гэтай прадукцыі дзяржаве. Заатветспецыялісты кааператыва павінны сур’ёзна зацікавіцца гэтым важным пытаннем і істотна палепшыць становішча.
Уважліва аналізуючы справы ў грамадскай жывёлагадоўлі, ужо цяпер зразумела, што раён сёлета не выканае прагнозных паказчыкаў па вытворчасці і продажу малака дзяржаве. Таму галоўнае цяпер – ліквідаваць адставанне. А для гэтага неабходна яшчэ раз удакладніць вытворчыя заданні, парадак аплаты працы ўсіх жывёлаводаў у залежнасці ад атрыманай прадукцыі. І, вядома ж, варта прымяняць меры больш эфектыўнага маральнага і матэрыяльнага стымулявання перадавікоў вытворчасці.
Аляксей СЯРГЕЙ

 

Поделиться новостью:

Популярно

Архив новостей

Похожие новости
Рекомендуем

Наталья Кочанова избрана председателем Совета Республики восьмого созыва

Председателем Совета Республики Национального собрания Республики Беларусь восьмого созыва...

Как высокотехнологичная диагностика помогает сохранять здоровье

Путь пациента к выздоровлению начинается со своевременной качественной диагностики заболевания....

Об обеспечении электробезопасности при проведении сельскохозяйственных работ

Для обеспечения электробезопасности, а также в рамках информирования Дрогичинская...

О профилактике электротравматизма в сезон рыбной ловли

Статистика несчастных случаев с населением в Республике Беларусь свидетельствует...